كشفت الفنانة الشابة سلمى أبو ضيف سر التطور الملحوظ في قدراتها كممثلة، والذي ظهر واضحاً عند تقديمها شخصية الفتاة الشعبية ضمن أحداث مسلسل “أعلى نسبة مشاهدة”، وقالت إنها خضعت لبرنامج مكثف في أمريكا تدربت فيه على تطوير استخدامها لمهارات الصوت ولغة الجسد.
أضافت سلمى أبو ضيف في حوارها مع الإعلامية منى الشاذلى، ببرنامجها “معكم منى الشاذلى”: سافرت أميركا للخضوع لكورس تمثيل مكثف، وكانت أغلب التدريبات على الصوت، وأنا فعلاً كنت محتاجة أشتغل على الموضوع ده وأعرف مخارج الألفاظ، وتعلمت أن صوت الممثل من أكثر الأدوات المستخدمة للتعبير عن انفعالاته.
وتابعت سلمى أبو ضيف: الجزء الثاني كان حول كيفية استخدام الممثل للجسد للتعبير عن مشاعره، وقدمت لهم في أمريكا مونولوج “عيب” لثريا حلمي، وكان مقصود إني أقدم حاجة مصرية، وانهم ميفهموش الكلمات، ولكن يستوعبوا معناها من طريقتي في استخدام الجسد.
سلمى أبو ضيف: ربنا وفقنى العام الماضى فى أدوار كويسة
وواصلت سلمى أبو ضيف: ربنا وفقنى العام الماضى فى أدوار كويسة، وبحس إن مع التجارب الحياتية فى حياتى ده هينعكس فى شغلى، والحمد لله ربنا وفقنى اشتغل مع نجوم مهمة وتقيلة زى الفنانة غادة عبدالرازق ومخرجين كبار، لافتة إلى أنه خلال العمل معهم وجهونى فى العمل، وكلهم ساعدونى وده مع الوقت فرق معايا كتير”.
تابعت سلمى أبو ضيف: أنا شخصية مسالمة، ومش بتاعة مشاكل ومبحبهاش من صغرى، ولما بدخل اللوكيشن بركز فى الشغل، واللي بشتغل معاهم كويسين وده رزق من ربنا، مضيفة: فى ناس كدة بتحس بالأمان لما تمثل معاهم، واللى مثلت معاهم حسسونى بده”.
ولفتت سلمى أبوضيف:” اشتغلت فى مسلسل “بين السطور”، “حكاية تحت الحزام” فى نفس الوقت، و”زينهم” ثم “أنف و3 عيون”، وبعدها “أعلى نسبة مشاهدة”، والمسلسل الأخير كان التجربة الأصعب لأن الشخصية تعرضت لمواقف نفسية واجتماعية صعبة جداً.
كشفت الفنانة سلمى أبو ضيف، أسباب نجاحها في تقديم شخصية الفتاة الشعبية ضمن أحداث مسلسل أعلى نسبة مشاهدة، موضحة أنها استعانت بفتاة من منطقة شعبية تتعلم طريقة الحديث الشعبي، كما أكدت أنها لا زالت حتى الآن غير قادرة على استيعاب نجاح العمل الذي عرض ضمن النصف الأول من مسلسلات رمضان 2024.
أضافت سلمى أبو ضيف في لقائها مع برنامج ET بالعربي: أنا لسه مش مستوعبة أوي نجاح أعلى نسبة مشاهدة، لكني مبسوطة، وكل الأدوار اللي كانت بتيجي قبل كده كان بيعجبني فيها الشخصية، والموضوع كان صعب علشان أفرق بين شخصية والتانية، والسنة اللي فاتت كان خطوة كويسة أعمل دور بنت صعيدية.
سلمى أبو ضيف: كان نفسي أعمل بنت شعبية
وأضافت: كان نفسي أعمل بنت شعبية، ولما جاتلي الفرصة السنة دي والسنة اللي فاتت عملت حاجة مختلفة عني في المداح، والناس صدقتها، وده إداني ثقة إني لما أدي مجهودي في الشخصية مع توجيهات مخرج شاطر بيطلع حاجة كويسة.
سلمى أبو ضيف: المسلسل تم تصويره في شوارع حقيقية
وعن ظهورها بدون مكياج في أحداث مسلسل أعلى نسبة مشاهدة، أجابت سلمى أبو ضيف: أنا ظهرت في أعمال كتير من غير ميك آب، وأنا مبحطش ميك آب في العادي والمخرجة كانت طالبة محدش يحط ميك آب، وإحنا مكنش عندنا ولا ديكور واحد وكل المسلسل كان متصور في شوارع حقيقية، وبيت الحطابة اللي صورنا فيه وحشنا وهو بيت أثري.
سلمى أبو ضيف: استعنت بفتاة شعبية لتعلم طريقة الكلام
وتحدثت سلمى أبو ضيف عن تفاصيل استعانتها بفتاة شعبية خلال تحضيرات الشخصية، قائلة: أول ما جالي دور شيماء اتخضيت لأنه بعيد عني، والمخرجة شافت بنت اسمها مي في الحطابة مكان البيت اللي صورنا فيه، وهي بصراحة جدعة جدًا وكانت معايا في كل لحظة في التحضير، وساعدتني كتير في طريقة الكلام والتكوين، وكنت بروح عندها أكتر من مرة وقعدنا بالساعات وطريقة شرحها كانت لطيفة جدًا، وقالتلي البنت الشعبية بتتكلم بإيديها.
أما عن تعاونها مع ليلى أحمد زاهر فقالت سلمى أبو ضيف: ليلى زاهر هي أختي الصغيرة، وموهوبة جدًا، وشقية في الحقيقة ودمها خفيف، وكنت برجع كل يوم من التصوير بقول الحمد لله، لو حد بيعيش حياة شيماء دي حياة صعبة، دي من الدار للنار.
أبطال مسلسل أعلى نسبة مشاهدة
مسلسل “أعلى نسبة مشاهدة” مقتبس من أحداث حقيقية بطولة سلمى أبوضيف ويشاركها كل من ليلى زاهر، انتصار، محمد محمود، فرح يوسف، هند عبدالحليم، محمد شاهين، إسلام إبراهيم، وإخراج ياسمين أحمد كامل، سيناريو وحوار سمر طاهر، ومن إنتاج عبد الله أبوالفتوح.
