في أول اعتراف صريح بعلم ضحايا مقلب رامز جاب من الأخر بحقيقة المقلب قبل تصويره، كشفت الفنانة ريم البارودي عن تلقيها دعوة للمشاركة في حلقة الفنانة سمية الخشاب، بهدف السخرية من علاقتهن بالمطرب الشعبي أحمد سعد، وقالت إنها تلقت اتصالا من سمية للمشاركة ولكنها اعتذرت لأنها ترفض الإهانة.
ريم البارودي: رامز كان جايبنا علشان يقول حريم أحمد سعد
أضافت ريم البارودي خلال الجزء الثاني من حوارها لـ برنامج العرافة الذي تقدمه الإعلامية بسمة وهبة: كنت هبقى ضيفة في برنامج رامز جلال مع سمية الخشاب في حلقة واحدة، وسمية كلمتني وقالت هنعمل حلقة حلوة وكانت عارفة، ولكن اعتذرت قبلها علشان عيب، جايبنا علشان يضحك علينا الوطن العربي، إهانة متعمدة، ويقول حريم فلان.
ريم البارودي: غاضبة من الربط بيني وبين اسم أحمد سعد
وقالت ريم البارودي، إنّها تغضب من الربط الدائم بينها وبين اسم طليقها الفنان أحمد سعد، مؤكدةً: “بتضايق أكيد، بتضايق من التريندات الرخيصة والمواقع اللي بقت معتمدة على التريندات”.
وأضافت ريم البارودي: المواقع دي لما راجل بينفصل عن ست بيحطوا ست تانية معاه، ويعملوا أفيش ورخص وحاجات وجايز كل واحد بقى عنده بيته وبقى عنده حياته.. ليه؟!”.
وواصلت قائلة: لازم أتضايق من ربطي باسم أحمد سعد، ومش شايفة إني كنت مأفورة في المشكلات معاه، وشايفة إني أقل بعد كل مطربات الوطن العربي اللي بيتخانوا ويتكلموا في برامج ويعملوا مداخلات، أنا مهنتش أحمد سعد واتكلمت في حاجة تخصني وفي عز المشاكل كنت بقول إنه كان راجل كريم وكويس.
يذكر أن سمية الخشاب حلت ضيفة على برنامج رامز جاب من الآخر مع زميلتها الفنانة آيتن عامر، وادعى رامز وقتها أنه جمعهن بسبب خلاف سابق على ارتداء فستان، وقال في مقدمة الحلقة: معايا بلطيتين من نفس التقسيمة والقطعية، عملوا قلق في الوسط الفني، وكان بينهم أتفه قضية، قال إيه دي لبست فستان دي، طب وإحنا مالنا يا ولية، إنتو للدرجادي حالتكم بقت مستعصية، مشوفتلكمش أدوار أثرت فيا، أو حتى جائزة من مهرجان الدقهلية.
وأعلنت سمية الخشاب عقب عرض الحلقة عزمها مقاضاة رامز جلال بتهمة تعمد إصابتها في أوتار القدم، وقالت خلال لقاء لبرنامج «تفاعلكم»، إنها اضطرت لدخول المستشفى في اليوم التالي من تصوير الحلقة؛ من أجل الاطمئنان على سلامتها الجسدية، منوهة بأنها فوجئت بدخول عدد من المشاركين إلى المستشفى كذلك.
سمية الخشاب: 3 نجوم دخلوا المستشفى بعد مقلب رامز جاب من الآخر
وأضافت: «لما رحت المستشفى بعد الإصابة اتقال لي أنتِ مش أول حالة تجيلنا، إمبارح جالنا 3 حالات من عند رامز، كل الناس اتصابت، أقل حد اتصاب حصل له كدمات في جسمه، ليه تعمد الأذية، معقول عارفين إنكم بتكسروا الناس كل يوم ومكملين تصوير وعادي ومش مشكلة؟!».
وعن القول إن المشاركين يوقعون على ورقة تفيد بموافقتهم على كل الملابسات والظروف الخاصة بالبرنامج، استنكرت: «يعني إيه ملابسات وظروف! هل أنا موافقة إني أتكسر؟ مهما مضيت بيني وبينك عقد، جسمنا بتاع ربنا مش من حقك تؤذيني نفسيا وجسديا وصحيا، ده ضد حقوق الإنسان والقانون».
وأشارت إلى أن المنشور الذي نشرته عن الحلقة عبر صفحاتها الرسمية بمواقع التواصل الاجتماعي وكتبت فيه «مش هسيب حقي منك يا رامز»، لم يكن على سبيل المزاح.
وأكملت: «ساعة الوقعة الواحد مبيحسش بالألم والوجع إلا بعدها، كنت بعرج ورجلي الشمال مش قادرة أدوس عليها وكتفي مش قادرة أحركه، الساسبنس بيخليكي مش قادرة تتنفسي وتخرجي مش مركزة ومش مستوعبة اللي حصل.. كله مفاجآت».
ولفتت إلى أنها تمتلك تقارير طبية مختومة من المستشفى بشأن تعرضها لكدمات متعددة وتمزق في أربطة القدم والكتف وكسر في الكعب جراء مشاركتها في البرنامج، منوهة أنها اضطرت لتحمل هذا الوجع من أجل استكمال تصوير مسلسلها «بـ100 راجل».
وصرحت بأنها رفعت قضية على رامز واتخذت إجراء من اليوم التالي لتصوير الحلقة، كما طالبت النائب العام بنظر الموضوع، مختتمة: «أكيد مش هسيب حقي، متأكدة إن معظم الناس اتصابت لكنهم بيسكتوا عشان عاملين اعتبار للقناة، أنا صحتي محدش هيزعل عليها.. وأذيتي محدش هيزعل عليها، كله إلا الأذية».
